ياااه ...بعد تقديم استقالتى من شغلانه الادمن لمدة 3 سنوات ..بدأت احس ان اعصابى هديت شويه ...وكل اللى فاكراه ان قبل الشغلانه دى الادمنه يعنى كان اغلب الناس بتقول عنى انى ريلاكس ومش عصبيه ...واعترف انى اكتسبت العصبيه شويه بعد الموضوع ده ...
فى البدايه كان الموضوع تسالى وكنت فاكرة انه بسيط جدا ومع الوقت اكتشفت ان القصه بدات تشبه خيوط الصوف المتشابكه ..الوان مختلفه وانواع مختلفه ..غيرت نظرتى لامور كتير وخلتنى افهم حاجات كتير منها انى افهم الشخص اللى قصادى من اول تعليق ..وبقيت قويه الملاحظه من كتر الاهتمام والمتابعه ..لاحظت امور كتير انا استفدت منها وامور كتير تضايق واكتشفت ان الصور والبروفايلات اى كانت الصورة ..ورد بلدى او عصفورة وديعه او ابتسامه طفل او بحر او خيل ...كلها مجرد صور لا تعكس اصحابها تماما ...وساعات يكونوا اجمل من الصورة
موضوع الادمنة شيق جدا والتجربه مثيرة وغنيه ومفيدة ...خاصه لما تكون مهتم بالمعرفه والاخبار ...بتتعلم انك تقرا الاخبار صح وتبدأ تعرف الصحيح من المضروب وتتعرف على مواقع كتير جدا ...اغلبها بينقل من بعض لحد ماتوصل للمنبع والاصل ..
*اغلب الاخبار والمعلومات على الفيس بووك مضروبه فعلا ...وكلمه اغلب هنا صح مش مبالغه لان فى صفحات كتير ..مجرد صفحه بتنقل الاخبار من ناس بيقولوا ...زى قالولوا كده ...
* اسوأ مافى الفيس بووك هو الفيديوهات وانا اتعلمت انى ماتعاملش مع الفيديوهات ابدا ولا انقلها ...لسببين الاول ان العنوان على اى فيديو بيكون غير المحتوى غالبا ...ان اللعب فى الفيديوهات شغلانه العيال الهواة ...قاعدين ينقلوا صور من سوريا على لبنان على البرازيل ...وممكن تلاقى الظابط فى الفيديو مش لابس الميرى بتاع المصريين ...بس العنوان بيقول انه فى مصر
* فى ناس كتير بتعمل شير من غير ماهى نفسها تشوف الفيديو او حتى تفتحه ...هى بتلاقيه عند اى حد ثقه من اصحابها تنقله فورا ..وتبدا حفله الخناق عليه
*لما تكون ادمن جروب تتحول الى ماما لجميع الاعضاء او الى ابله فى الفصل ...وهتلاقى حاجات كتير تضحك جدا ..ان الكل بدا يشتكى لك ....العضو ...من ناحيه والطرف التانى اللى معاه المشكله ...ده قالى كذا وانا رديت كذا وفى ناس جميله جدا بتعمل كوبى اند بيست لاى مشكله وتبعتها ...وتقولك شاهد قبل الحذف
* فى الجروبات بيكون فى شلل وبلديات ..يعنى بتلاقى ناس من منطقه واحدة هم غالبا بيكون لهم نفس الاسلوب والافكار واحتمال نفس الاكونت ...والله فكرت فيها كتير وقلت جات ازاى دى ان لهم نفس الافكار ياربى ...طبعا بيكون فى بينهم نوع من العصبيه ..اقصد التحيز لبعض جدا وانا واخويا على ابن عمى وانا وابن عمى على الادمن ..
* من ملاحظاتى فى الجروب ان الناس اللى بره مصر نوعين ..نوع خليجى ونوع امريكى اوروبى ...الخليجى بيظهروا على الفيس اكتر يوم الخميس والامريكى بيظهروا يوم السبت اكتر
* فى ناس عندها مشكله مع الكى بوورد العربى فبيكتبوا بوستات وتعليقات بالانجليزى وطبعا احنا مقدرين ده كويس بس مشكلتى مع اللى بيردوا عليهم مفيش عندهم مشكله الكى بوورد بس لازم يردوا هم كمان بالانجليزى ...ياللله نقوى اللغه ياجماعه
* فى وسايط فى الجروبات يعنى لوحذفت تعليق او حذفت عضو لا قدر الله لان دى" كارثه "تلاقى صاحب الشخص الى اتحذف له التعليق بينوب عنه فى الكلام والمراسله ومتعشمين فيك خير ...والذى منه من قواعد الاحراج
* مش عارفه ليه الناس كلها اللى قابلتها بتعتبر ان حذف اى تعليق او بوست نهايه العالم ...ليه نفسى افهم ..وده علاقته ايه بالكرامه والكلام الكبير اللى بنسمعه لو حد اتحذف له بوست لاقدر الله
* قصه التضامن والتظاهر فى الجروبات يعنى لو عضو اتحذف تلاقى ناس مشيت وراه ...طب ليه برضه مش فاهمة ..انا اعرف ان لو الادمن مشى هو ده اللى تمشوا وراه :))))
* فى حاجه قابلتها فى الجروب القديم ...ان فى اعضاء هس هس مالهمش اى حس برغم وجودهم متابعين بقوة وبدون حتى لايك واحدة وبيزعجهم السين باى ...يعنى انا حذفت اسماء كنت اول مرة اشوفها وفى ثوانى كنت بالاقى نفس الشخص بيطلب اضافه فورا
* ادمن الجروب بيحقق شويه شهرة من ورا موضوع الجروبات دى وخاصه لو العدد كبير شويه ...يعنى كنت باقابل ناس الاقيهم بيقولوا ايه اخبار الفيسبوكيه
*من مشاكل الادمنه كمان انك تختلف مع الادمن المشارك لك ...لان طبعا كل شخص له وجهة نظر وتلاقى الناس فى اى مشكله تعمل منشن للادمنز علشان يدخلوا ...فجاة تلاقى نفسك لوحدك والباقى فص ملح وداب
*ان كل ادمن بيكون فى ناس فى الجروب معاه ولما تحصل اى مشكله يلجأوا لده بالذات ...ويطنشوا التانى ....يعنى بيختاروا مين فى الادمنز ممكن ييجى فى صفه
*اه فى حاجه لذيذة قوى هى القرايب والناس اللى معاك فى الشغل وياسلام لو مديرك او استاذك معاك فى الجروب ...بتلاقى المجاملات اشتغلت ..احلى كلام وموافق جدا على كل كلمه فى البوست وووووو
* ملاحظه مهمه جدا ان مفيش حد على الفيس تقريبا بيقرا موضوع طويل ...يعنى فى ناس اخرها سى مور ...وتقف بعدها اما كونتينو ريدنج اعرف ان البوست راحت عليه ...الناس بتحب القرايه تيك اواى ...بس انا لا على فكرة :)))
* حط صورتك بس على الفيس هتلاقى الشعب كله عملك لايك ...وعلى فكرة ده اكتر بوست بيشتغل على الفيس حتى لو الصورة وحشه ...اه وربنا
* لو حذفت عضو ورفضت رفضا باتا انه يرجع مش بييأس على فكرة وبيروح يغير اسمه لو كاتبه انجليزى يحوله عربى او العكس ويغير صورة بروفايله ...ويطلب اضافه تانى بسيطه يعنى
* اكبر مشكله للادمن لما اولادها يعرفوا ان هى الادمن بيطفشوا من الجروب واى مشكله طبعا الفيس هو السبب ...بس بصراحه ممتعه جدا ومفيدة وخاصه لما تشارك مناسبات الاصدقاء ولما تلاقى ناس تثق فيك وممكن تاخد رايك فى موضوع ...ومن اجمل المواقف معايا ان فى كذا شاب سألونى لو عندى بنت تشبهنى فى الصفات هم عاوزين عروسه ..
اجمل حاجه كنت باقول ان الجروب عتبته حلوة على ناس اتجوزت اثناء معرفتهم بنا وبالجروب وناس الحمدلله شاركونا نجاحهم فى الدكتوراه والماجستير وناس جالهم بيبى جديد وناس اولادها اتجوزت او اتخرجت ...ناس عرفونا واتعلقوا وفضلوا معانا وناس استفدنا منهم ..وناس زهقت ومشيت بس كان لهم بصمه وناس شتمتنا وناس شكرتنا ...وناس قابلوا اصحابهم عن طريق الجروب
ويوما ما كنت ادمنا لاحلى جروب حتى بعد ما اتفتفت حتت ..بس كل الناس عرفوا بعض وعملوا شبكه كبيرة من ورق وفروع الورد الفيسبوكى
*
