الخميس، 24 يناير 2013

ياترى مصر هتتغير ...سؤال بيطرحه كل مصرى ؟؟
والاجابه هى ايوة مصر هتتيغر ..لما نبدأ نعلم  اولادنا ونيتنا هى انهم يكونوا شباب محترمين وعندهم انتماء لدينهم وبلدهم ..وما يكونش همنا انهم يكونوا مهندسين ودكاترة وحاملى القاب وبس ..

لما نقولهم فى المدرسه ذاكر مع اصحابك وساعد اى واحد محتاج منهم للمساعدة وبلاش تبخل بمعلوماتك عن غيرك ..وبلاش نقولهم مجهودك لنفسك حافظ عليه ..ما تقولش انك اشتريت المذكرة ..اوعى تقول لحد انك بتاخد درس ..اصلى خايفه عليك من الحسد ..
مصر هتتغير لما نشجع اولادنا على ان التعليم نعمه مش شهادة عاوزة برواز ...وانه ممكن يتعلم اى شىء يتقنه ويحبه مش لازم علشان ابوه دكتور او مهنس  يكون هو كمان زيه علشان خايف على العيادة او الصيدليه تتقفل او مكتب الهندسه ...
مصر هتتغير لما الدكتور والمدرس يعرف انه بيقدم خدمه وانه صاحب رساله مش رجل اعمال ..

مصر هتتغير لما الناس تقول هنشتغل رغم ان الامكانيات بسيطه لكن ممكن برضه نحاول ..وبلاش نقول اننا ممكن نبنى نفسنا بره وننجح لان الامكانيات هناك متاحه ..بشكل افضل
مصر هتتغير لما اللى بره ينقل افكاره وخبرته للناس اللى جوه ..ولو ساعات زكاة عن عمله 

مصر هتتغير لما نبطل نقول على الوقت كمان شويه ونتعامل بالدقيقه والثانيه ..
الفساد اللى عشناه سنين طويله هو اللى خلى الناس تقول ان اصحاب الراى جماعات محظورة ..وهو اللى خلى الناس تقول سرقه الثورة ..واننا مش عاوزين نشتغل بحجة الظروف والاوضاع ..وان الناس اللى فكت اسرها بقوا متطرفين راى وفكر لان محدش عاوز يسمع التانى ..مصر هتتغير لما نكون عاوزينها تتغير ..انما لما نبقى كلنا التراس رأى فالمتطرفين عمرهم ما هيبنوا بلد ولا هيتقدموا ..مصر هتتغير لما كل واحد مننا يبص لنفسه ويسألها انا اقدر اعمل ايه ويعمله فعلا 

الثلاثاء، 22 يناير 2013

الغريب ان الاجهزة تشيخ وتهرم وتموت وتندثر مع الايام ..الراديو فى وقت ما كان الاختراع المفضل لكثير منا وصديق مرافق لنا ..فى ايام دراستنا ..صوت الراديو المميز اثناء الانتقال من محطه لاخرى كان غالبا بدايه الافلام المصريه ,,خاصه فقرات الصباح المميزة التى يحفظها اغلبنا عن ظهر قلب ولا تعرف عنها الاجيال الجديدة شىء ..شىء مضحك حاليا اننا كنا نتابع حواديت ابله فضيله ..ونستمع الى كلمتين وبس والى ربات البيوت ...على اذاعه الشرق الاوسط عشنا اجمل لحظات الخيال مع جمال صوت ايناس جوهر ..هل ياترى مازالت دروس الانجليزيه والفرنسيه ساريه ...لا اعرف ولا اتوقع ذلك ...كنت تستطيع ان تعرف ان الساعه الخامسه عندما تسمع صوت ام كلثوم بدأت حتى لو كان صادرا من شباك الجيران ...فى احدى المرات فى المسجد قابلت سيدة كبيرة فى السن فى عمر والدتى او ربما اكبر وفوجئت بكم الثقافه الدينيه لديها ومن الحديث عرفت ان مصدرثقافتها هو اذاعه القرآن الكريم فهى لم تكمل تعليمها ولكن تتابع الأذاعه بانتظام ...الجيل الحالى لا يعرف عن الاذاعه الا اسامه منير ولا يعرف الراديو الا من السيارة وعند بدء تشغيله يضع كل منهم السماعات فى اذنيه ليبتعد فى عالمه ...موت بعض الاشياء فى حياتنا امر ليس بالسهل واحيانا لا يعوض 

الجمعة، 18 يناير 2013

رحله ام العروسه من اول لما يقولوا ..فى عريس ...لغايه صينيه الحمام بالفريك ...

لما احب احكى تجربتى دى الاقى فى تفاصيل كتيرة جدا ..وصور متلاحقه وحدوته ماتنفعش غير بالبلدى كده ونقول فى اولها ...صلوا على النبى ..كمان زيدوا النبى صلاة ...اللهم صلى على محمد واله وصحبه ..
طيب نبدأ ازاى ومنين ..عن نفسى طول الفرح ولغايه النهاردة بردد واقول الله يسامحك ياشوشو ...هى اللى اصرت انى البس جزمه سواريه وكعب عالى ..بعد لما رجلايا دابوا من اللف والوقفه
انك تكونى ام عروسه مصريه فده شىء مش سهل ويدعو للفخر بعد ما تشوفى فرح بنتك وفرحتها مع عريسها ..وشقتها وكله الحمدلله تمام... لازم تعرفى ان فى جندى مجاهد ورا القصه الطويله دى ..الموضوع فيه مراحل وفيه خبرات اكتسبتها ..لكن بصراحه برضه رغم اى تعب الام بتكون  فرحانه انها بتحاول تسعد بنتها وعريسها ...ومن خلال تجربتى لقيت ان الاحساس بالفرحه ملازم له احساس بالقلق ..ودايما افتكر نفسى زماااان طيب ليه ماكنتش قلقانه على نفسى .. فى يوم زى ده ابقى عاوزة احضن امى واقولها اكيد جه اليوم اللى احس فيه بنفس مشاعرك الجميله ..
اول لما يتقدم العريس وتتم الاتفاقات بيكون فى حماس فى البدايه غير عادى ..عن نفسى كنت باشترى لبنتى من وهى فى اولى ثانوى ..بس لانى مش بحب الزحام كنت باحاول اشترى اذواق تعيش وحاجات ماتاخدش مكان فى التخزين وطبعا زى كل المصريين سحارة السرير وبلاكار الدواليب الخاصه بى وبدولاب بنتى بيكون مخصص للجهاز ...وبعد شويه بيكون البيت كله يعنى ورا الباب تلاقى ..فوق الدولاب تلاقى ...اى مكان فاضى تلاقى كرتونه وعليها مفرش تعرف انه جهاز العروسه ...

انك تكونى ام العروسه فى مصر هتعرفى اماكن كتير جدا للشوبنج ..وتلفى لما تقولى اااااه بجد ..

فى الاول بتكتبى ورقه وقلم وتكونى منظمه وتختارى المحلات بعنايه ..وبعد شويه تلاقى ان الزهايمر اشتغل مش بس عندك لكن عند العروسه كمان ..والشرا بقى ادمان يومى 
فى مصر الخطوبه بتكون على العروسه ..والفرح مشاركه بينهم..تجهيز الخطوبه بتكون الاعصاب اهدى والوقت لسه رايق وفى فرصه تختارى بهدوء ..لكن قبل الفرح بيكون التركيز على العروسه والاولويه لفستانها ولوازمه وتجهيز شقتها ..وللفرح ولاخواتها والبيت كله
العروسه فى مصر عليها كل لوازم المطبخ  " الحلل والصينى والكوبايات والصوانى وكله كله ......"والتنجيد والستاير والسجاد وكل اكسسوارات الشقه والمفارش  ..وطبعا مشاركه الموبيليا .

الحاجات دى بتحتاج لف جامد جدا جداوشيل كتير  ..ومرة كنت مع جارتى وقالت لى انها عند تجهيز بنتها راحت سيتى ستارز واشترت كل حاجه بنتها ..واحد فى المحل قالها كان ممكت تشترى نفس الحاجه بنص التمن فى الازهر وحمام التلات ..خدت عربيتها وراحت لقت نفس الاذواق ولو مش موجودة بتطلبها من صاحب المحل بالاسم هو يروح يجيبها مع فرق السعر ..طبعا انا ماصدقتش كلامها ورحت اشتريت حاجات من سيتى ستارز برضه ..فى الاول ملايات سرير وكوفرتات وشويه حاجات مطبخ ..وبعدين قررت اروح الازهر كانت تجربه مثيرة جدا ..مشكلتها هى شيل الحاجه ..لان الشوارع ضيقه وزحمه بس فعلا فى حاجات مميزة وجميله يعنى مثلا ..فى بطانيه فرق السعر بينها وبين سيتى ستارز كان 600 جنيه ..تخيلوا ..
فى واحدة صاحبتى قالت لى انها اشترت كل جهاز بنتها فى يوم واحد من نفس المكان لانها ماكانتش بتشيل اى حاجه لبنتها غير فلوس ..بس طبعا اشترطت على بنتها ماتقولش رأيها هى هتجيب الحاجه كلها من نفس المكان وتخلص ..برضه فكرة 
مشكله اليومين دول ان البنت عاوزة تشترى كل حاجه على ذوقها وتلف على كل فتله ..ومفيش اى حاجه تقضى... كميه وقت مهدر ..واموال بصراحه ربنا يكون فى عون الناس ..فى لف على الموبيليا وده ممكن فى القاهرة والافضل دمياط من اولها ومن قصيرها ...بصراحه فى كل الاذواق والاسعار هناك ..بس مشكلتها ان المعارض كلها عمارات وفيها اسانسير لكن تطلع لاخر دور وبعدين تتفرج دور ..دور ..يوم مرهق جدا لكن ربنا بييسر الامور ..وطبعا فى الفرش المودرن اليومين دول الشباب بيعجبه جدا ..
فى يوم مخصوص للسجاد وبرضه مفيش احسن من معارض النساجون فى العاشر او فى طريق المطار او عباس العقاد ...ده موضوع سهل شويه لان فعلا ممكن تشترى من المعرض كل السجاد مرة واحدة وطبعا بعد العفش علشان الالوان ..

بعد السجاد او موازى له الستاير وبصراحه موضوع الستاير متعب شويه لانه شرا وتفصيل وموديلات وافلام هندى وكل اوضه لون ..
بعد لما نخلص شرا الحاجات الرئيسيه بتلاقى حاجات كتيرة جدا ..وتفاصيل فى المطبخ والحمام والنيش ..زى الحاجات البلاستيك ودى كمان على فكرة مش بسيطه مرة دخلت محل اشترى فوجئت بالاسعار فسألت الراجل ليه كده ..قالى اصلها تركى ..طيب فين ياعم الهلال والنجمه والصينى ...وام العروسه والعروسه بعد ماكانوا بيرفضوا يشيلوا كيلو طماطم ..يلاقوا نفسهم شايلين طبق غسيل وعصايا للمقشه ومساحه ..خلاص بقى ..
طبعا الشهر قبل الفرح بنقضى اغلب اليوم فى الشارع ..لحد يوم الفرح علشان كمان شرا هدوم العروسه جديد فى جديد
اهم طلعه فى المواضيع دى كلها فستان الفرح ..يوووووه ..قصه جامده جدا ويمكن اهم واكتر مرحله فيها لف ..طبعا البركه فى الفيس بووك وجروبات العرايس اللى بتقوم بالواجب وتلاقى بنتك معاها الف عنوان اتيليه لفساتين الافراح ..وده اكتشاف جديد بالنسبه لى ..لانى عرفت ان فى ناس بتعمل مشاريع حلوة جدا ومربحه فى بيتها ..يعنى اغلب الاتيليهات هى جزء مقتطع او شقه صاحبه الاتيليه لفترة محددة من اليوم وعندها واحدة او اتنين يساعدوها ..ومجموعه فساتين ومستلزمات زى الورد والتاج والطرحه وكمان جزمه العروسه ...حاليا تأجير الفستان بيكون بالالاف برضه ..يعنى ايامى كنت شاريه فستانى من رجاء الجداوى وكنت باقول عنه حكايه ثمن الفستان كان ربع تمن الايجار حاليا ...ولازم تسيب بطاقه صالحه للاستعمال " يعنى انتخبت بها قبل كده ...مرسى طبعا "  وكمان تمضى على وصل امانه وتسيب تأمين محترم.. كل ده علشان تاخد الفستان ليله واحدة ...

من اكبر اماكن النصب فى مصر البيوتى سنتر ..والسبا والكلام الفاضى ده كله ..بس طبعا  البنات بتشبط كلها تروح  ...برضه الفيس بووك بيبيع كتير فى الفيلم ده ..ونصيحتى لاى بنت..اغلب اللى بيعملوه هناك ممكن فى البيت ...او مع واحدة قريبتك او صاحبتك ..
 اكبر مجهود بيتم فى فرش الشقه وخاصه فى انتظار الصنايعيه البهوات..لتركيب الاضاءة والدهانات ..واى اصلاحات الشقه بتحتاجها ..

فى نفس الوقت بتكون ام العروسه قاعدة تنزل كل المشتريات من الدواليب والسحارة والنيش وورا الابواب لتجميعها ونقلها شقه العروسه ..ده يوم وفيلم بيحتاج مساعده من الاخوات والاب والعريس وخال العروسه وابن خالتها كله يشيل للعربيه النص نقل ..وطبعا كل الحاجه بتروح اوضه فاضيه هناك وتتجمع لوقت الفرش وتوزيعها ...
كنت فاكرة انى خلاص مش هاشيل تانى ..لكن والله كل يوم تستجد اشياء جديدة نشتريها ونشيلها للشقه ..فى ملاحظه ظريفه هى كميه الكراتين الفاضيه والشنط اللى بنجمعها بعد فرش الشقه ...كنت باقولهم تفتح مصنع تدوير
بيتخلل القصه دى لف على القاعات واختيار قاعه للفرح وتحديد ميعاد لكتب الكتاب ..وحجز قاعه برضه او مسجد ..وانك تعزم الناس من غير ما تنسى حد ..
خلاص كده احنا نقلنا ..على توضيب شقه العروسه ..وطبعا ربنا يخلى الاهل اللى بتساعد من كل قلبها والاخوات اللى بيعتبروا ان دى شقه بنتهم وعاوزينها تكون منتهى الجمال ..واللى بيشوف اى حاجه ناقصه يجيبها او يعملها وبسرعه ..دى حاجات بتخلينى دايما اقول مهما كانت مشاكل بلدنا لكن فيها حاجه حلوة ..
انك تكونى ام عروسه مصريه مطلوب منك تعملى عشا للعرسان واكل لمدة اسبوع ..يوصلها كل يوم دليفرى وسخن ...وانك تشترى تموين البيت والمطبخ وتسيحى الزبدة البلدى ..وربنا يخلى امى اللى عملت لى كل ده لى ولبنتى ..
اكبر مفاجاة كنت ناسياها هى كحك العروسه ..بصراحه نسيته وامى وبنت اختى كانوا بيقولوا دى فرحه لازم نتلم كلنا ونعمل الكحك ..بس كنت خلاص قربت انتهى قلت لهم لا جاهز علشان الوقت والتعب ..

يوم الفرح صاحبتى الغاليه قالت لى اول لما الفرح يخلص لازم تقلعى الجزمه العاليه دى وتجرى على شقه العروسه تسخنى العشا وتولعى الشمع وتحطى لهم الورد الطبيعى ...
العشا اللى هو موروث مصرى اصيل حمام بالفريك ..وعلى فكرة فى مطاعم بتجهزه وناس بتبعت تشترى جاهز لكن طبعا البيتى يكسب 

اااااااه صحيح نسيت اقول حاجه مهمه جدا هى ان ام العريس بتتعب جدا ..هى بتظهر مرتين مرة فى الشبكه ومرة فى الموبيليا ..وبتتعب جدا فى اختيار فستانها فى الخطوبه والفرح ..ومن موقعى ده احب اقولها وبالنحوى ....هيهات 


الثلاثاء، 8 يناير 2013

قراءة فى كتاب سر المعبد

كتاب " سر المعبد " اثار ضجه فى الايام الماضيه على صفحات الفيس بووك وفجأة تحول الجميع الى محب للقراءة وشغوف بقراءة هذا الكتاب ...ولكن لو سألت كل من كتب او نقل او تحدث عن الكتاب اذا كان من عادته ان يقرأ لهذا الكاتب ..فالاجابه هى  لا فى الاغلب ...وهذه ايضا اول مرة بالنسبه لى ان أقرأ لهذا الكاتب ..وشاهدته فى لقاء سابق على احدى الفضائيات ..
لماذا هذا الكتاب ؟ بما ان الكاتب ليس شخصا شهيرا او كاتبا محترفا ..فالتعجب هنا يكون ناحيه القراء لا الكاتب !!
اعتقد ان الاجابه هى الشغف بمعرفه اسرار الجماعه من شخص قضى فيها 18 عاما ...والسؤال هل الكتاب فعلا يحوى اسرار ..وهل الاسرار موثقه ؟؟
عن نفسى قرأت الكتاب دون ان افكر مسبقا فى اقتناءه او قراءته ولكن خبرا استوقفنى هو طباعه الكتاب للمرة الثامنه مما يعنى كثرة التوزيع والاقبال ...

 امران  يرفض عقلى  ان يناقشهما ..او يقتنع بهما  ..
الامر الاول هو فكرة ان يكون هناك تنظيم لجماعه متشابه بشكل كما يقول الكاتب " كوبى اند بيست " ثم يصبح هذا التنظيم عالمى ومنتشر فى اكثر من 90 دوله....
الامر الثانى هو مبدأ السمع والطاعه  العمياء والغاء العقول ..فهذا امر لا يستوعبه عقلى او يصدق انه موجود فى عصرنا الحالى او السابق او التالى 

قبل  قراءة الكتاب هناك اسئله يجب ان نقف امامها :
1- من هو الكاتب وماهى كتاباته السابقه وهل سبق ان قرأت له ؟

2- اسم الكتاب " سر المعبد " لماذا اختار الكاتب هذا الاسم والى ماذا يشير ؟
3- اسماء الفصول فى الكتاب ..لكل فصل اسم اختاره الكاتب وبدأ بتشبيه او قصه ترمز الى اختياره اسم كل فصل ...

4- استشهادات الكاتب فى كتابه ..من هم الفلاسفه او الكتاب الذين استشهد بهم ..ودلالات هذه الاستشهادات ....
5- اهم نقطه بالنسبه لكتابنا هذا هى الحقائق الموجودة فى الكتاب ..والدليل على مصداقيه هذه الحقائق ؟ هل هى مثبته فعلا ؟
6- توقيت نشر الكتاب وماله من دلالات ؟
ملاحظات حول الكتاب :
** الكاتب محامى انضم الى تنظيم الاخوان لمدة 18 عاما ثم قرر الابتعاد عنها 

**  وفى مقدمه الكتاب يضع الكاتب شرطا للقارىء هو ان يفكر وربط عمليه التفكير بالاحرار والحريه
** استشهادات الكاتب منقوله من البرت اينشتاين ..لا مارتين وغالبا كل فصل يحوى قصه ارتبطت باسم الفصل ... قصص اغريقيه ..ايكاروس ..نارسيس ...اسطورة هنديه ...قصه تاييس والراهب بافنوس ..فيلم المنسى لجوليان مور ..ايضه اسهاب فى نقل قصه موسى والخضر فى احد الفصول .....قصه ادم وحواء وخروجهما من الجنه 

** بالطبع وللوهله الاولى يرتبط اسم الكتاب بكهنه المعابد ويتردد التعبير اكثر من مرة ان الاسرار كانت فى صندوق لدى كبار الكهنة او سدنه المعبد فى اشارة الى الجماعه
** الفصل الاول
اسم الفصل " صوت الحريه " اهم نقطه اثارت انتباهى هى تفسير كلمه " خير اجناد الارض" بانهم الجنود الذين يطيعون اوامر قاداتهم ولا يتمردون عليها وانهم عندما يكونوا فى تنظيم يكونوا اكثر الناس طاعه
فى الفصل الاول يتحدث الكاتب عن حبه الشديد لجماعته وانتماءه لها ويشبه ارتباطه بهم بقطرة الماء فى السحابه الا انها عندما سقطت انبتت شجرة الكنز التى يصف بها وصوله الى حقيقه الجماعه ثم يضرب مثلا بكونتا كينتى  الذى كان يتمرد على العبوديه ثم يستنيم لها ..الا ان عبوديه التنظيمات تكون اقوى
**يضع فى السياق قصه فاوست الذى باع روحه للشيطان مقابل المعرفه ...وفى نفس الفصل اشارة الى قصه فيلم وداعا شاوشنك ...كل هذه ليدلل على سجن الجماعه والتنظيم الفكرى طبعا
** اشارة فى الفصل ايضا الى شخصيات مستنيرة داخل الجماعه مثل عبد المنعم ابو الفتوح وابراهيم الزعفرانى
**الهجوم ضده داخل الجماعه وانه عبارة عن نغمه نشاز فى سيمفونيه الجماعه ثم لقاءه مع مأمون الهضيبى الذى كان القشه التى قصمت ظهر البعير وخرج بعدها من الجماعه لان الرجل كان يحدثه باستعلاء وصيغه الامر ثم ذكره انه رجل قانون كيف يخالف قوانين الجماعه فرد عليه الكاتب ان الجماعه نفسها بلا قانون اشارة الى مخالفه الماده 86 وانشاء تنظيم دون رخصه
***قراره بالخروج من الجماعه وهدوء نفسه لهذا القرار 

***** الفصل الثانى :
       "ايكاروس "
هى قصه معروفه عن شخص حاول الطيران بجناحين ملتصقين بالشمع ورغم تحذير الاب عدم الاقتراب الى الشمس الا انه حبا للحقيقه اقترب منها فذاب الشمع وسقط صريعا وفى نفس الوقت ان الاسرار لدى الكهنة فقط ولا يستطيع اى اخوانى الوصول اليها
***الربط بين هذه النقطه والتنظيمات الماسونيه ان الاسرار لدى الكبار فقط ثم يلمح الى كتاب الغزالى الذى تحدث عن المرشد الثانى وقال انه كان ماسونيا
هل يصدق الشيخ الغزالى ام يصدق جماعته التى يحبها ...كيف استمر كاتبنا فى الجماعه بعدما عرف هذه المعلومه ؟؟؟؟ 

ذكر ان ما اوقف حيرته هو حديث الشيخ ابراهيم عزت عندما سئل فقال ان الغزالى كتب هذا الكلام فى لحظه غضب 
وهناك اشارة اخرى لنفس النقطه ان اغلب مقالات سيد قطب كانت فى التاج المصرى لسان حال المحفل الماسونى
*** ينتقل الى الهيكل التنظيمى للجماعه وانها اقسام ينتمون اليها كان اخطرها قسم الوحدات الخاص بانشطه الاخوان داخل الجيش او الشرطه 

اما تصنيف الكاتب داخل اقسام الجماعه فهو فى قسم المهنيين ...
يستعرض الكاتب مشكله القبض على بعض الاخوان ومن بينهم محمد بديع ومطالبتهم له بالتحرك من داخل السجن الا ان بعض القياديين كانوا متقاعسين عن نجدتهم حتى فى توزيع الاموال على اسرهم وهم فى السجن 
**الانتخابات داخل الاخوان الكل ينتخب والكل مرشح
*** يشير الكاتب الى مبادرة سليم العوا للصلح بين الاخوان والنظام فى عام 95 ، 96
وكانت للعوا وجهة نظر ان تلتزم الجماعه بالدعوة لانها افضل وسيله انسانيه للحضارات
وافق عمر سليمان على الصلح بشروط :

- ان يمتنع الاخوان عن خوض اى انتخابات نقابيه لمدة 5 سنوات
- اتاحه مساحه حركه للاخوان من خلال المساجد
- الافراج عن كل المساجين
وافق العوا على هذه الشروط الا ان عمر سليمان ابلغه ان الاخوان لن توافق فاستغرب 

الا ان ماتوقعه عمر سليمان كان مفاجأة للعوا ..رفض قاطع من مامون الهضيبى للعرض ..
تحدث الرجل ايضا عن اختراق جهاز الامن للجماعه " المرشد السرى "
    الفصل الثالث :
المرشد السرى وزمن الجواسيس
اهم النقاط فى هذا الفصل 

***حديثه مع د. محمد بديع وراء القضبان وانه قد رسم خطه ان يتم كتابه رساله مدح لمبارك بعد زيارته لبيروت
***جواسيس الاخوان الذين يكتبون تقارير لاجهزة الامن 

وجواسيس داخل الجماعه يكتبون تقارير لقيادات الاخوان
ويسوق قصه على هذا الوضع انه كان يدافع عن اخوانى وفى مكتب وكيل النيابه ..مكتوب بها " المذكور اعلاه من العناصر المتعاونه مع الجهاز "
** تلميحات حول الصوفيه وتحريم بعض الاخوان الصلاة فى مساجد اولياء الله الصالحين وآل البيت
*** كتابته 3 مقالات ينتقد فيها الجماعه حول هذه العناوين :
- اولويه الدعوة فى حياة الجماعه
-الامراض النفسيه للاخوان لابتعادهم عن منهج الدعوة 

-ذم كل من هم خارج الجماعه والنظر الى الاقباط كانصاف مواطنين
*** كان عادل حموده هو الراعى الرسمى لنشر هذه المقالات
     الفصل الرابع 

مدينه النسيان
بدا الفصل بسرد قصه نارسيس الذى عشق صورته فى البحيرة ومبدأ النرجسيه 

شيفونيه الجماعه التى تحولت الى حاله من التعصب لها 
مشكلته مع مامون الهضيبى الذى انكر ماقاله فى مناظرته مع فرج فودة عام 1992 فى معرض الكتاب " نحن نتعبد الى الله باعمال النظام الخاص للاخوان المسلمين قبل الثورة "*** سرد اخر لقصه تاييس والراهب بافنوس
  الفصل الخامس 

صندوق الاسرار 
*** الهضيبى يضع غطاءا سياسيا شيوعيا ليبرر الاغتيالات التى قام بها الاخوان ويرفقها بقصه اسطورة هنديه عن الكذب
*** نبذه طويله عن الطريقه الشاذليه الصوفيه واشارة الى كراهية الاخوان للصوفيه 

*** محاوله اغتيال عبد الناصر عام 1965
*** اخطر من حط رحاله فى مصر د مرسى والشاطر ومحمود عزت ومحمد بديع
***1992 عام الزلزال ونجاح الاخوان فى انتخابات نقابه المحامين 

*** تزوير نتائج الانتخابات وذكر الكاتب انه فاز داخل الجماعه بها الا انه تم تزوير النتيجه
   الفصل السادس 
"الاخطبوط "
*** اختيار مصطفى مشهور لسيف الاسلام حسن البنا وفرضه فى انتخابات الجماعه
*** اتهام الجماعه بقتل سيد فايز وابنته 

***تصريحات مصطفى مشهور التى اثارت بعض الاعضاء ضده هذه التصريحات هى :-من عادى الاخوان فقد عادى الله
ورسوله 

- لا يجوز دخول الاقباط الجيش
اشار الكاتب الى امتعاض الاخوان من هذه التصريحات
حديث طويل عن الولاء للجماعه مقدم على الكفاءة واختيار ابن حسن البنا لمجرد استغلال الاسم فقط
الفصل السابع
"الخطاب المجهول "

-اعلان نيته الخروج من الجماعه عام 2002 
تكرار ان الاخوان يكرهون الاحرار "هو واحد منهم " ويحبون العبيد وهذا السبب فى انه لم يرتفع شأن اى شخص فى الجماعه بعد وفاة التلمسانى الا اذا كان عبدا
فى هذا الفصل بدايه ظهور رغبه الاخوان فى التقارب مع الغرب وامريكا من خلال محادثات حدثت داخل السجن بين الاخوان وسعد الدين ابراهيم
وتحديد توقيت بدء هذه الاتصالات فى عام 2005 واقطاب التفاوض هم خيرت الشاطر وعصام العريان وينشر رساله معنونه بحرف B اختصار كلمه BIG اى الكبير مرسله الى خيرت الشاطر بها بعض البنود :

1- لن يتم تغيير خريطه المنطقه
2- لن يكون هناك اى مساس بالاتفاقيات "كامب ديفيد"
3-تقبل اسرائيل فى المنطقه
تلا هذا تصريح العريان فى صحيفه لبنانيه ان الاخوان حال وصولهم للحكم سيغترفون باسرائيل 

الفصل الثامن 
الشيخ الحكيم
قصه لقاءه بشيخ فى المسجد بعد ان انفصل عن الاخوان وفوجىء بانه كان مدرس اللغه العربيه فى الثانويه ومدى تأثره بحديثه مع هذا الشيخ 

شرح باسهاب عن كلمه اسلامى
فى هذا الفصل تلميحات لاحاديث كثيرة دارت فى اجتماعات الجماعه عن النيه لخلع مبارك عن طريق المظاهرات فى كل ميادين مصر حتى ان مصطفى مشهور اعلن فى صحيفه لبنانيه ان الاخوان سيصلوا للحكم عام 2018
الفصل التاسع
على بئر البارود
مقوله الشيخ " الاسلام هو الحل والمسلمون هم المشكله "
توضيح كلمه لحوم العلماء مسمومه وانها ليست حديث ولكن كلمه لابن عساكر ومناسبتها 

شرح لتاريخ بدايه الوهابيه
شرح لاختيار رمز الاخوان السيفين بينهما مصحف وكلمه " وأعدوا " ان حسن البنا كانت رغبته ان تكون الحركه جيشا لا مدرسه
***تعاطف ضباط النيابه العسكريه مع الاخوان عند القبض عليهم ومصارحه احد الاخوان له ان الجماعه لها تنظيم داخل الجيش
من اهم الملاحظات ان الكاتب يتحدث فى اغلب الفصول عن الصوفيه دوننقد لها ولكن هناك مدح خفى لها 

الفصل العاشر 
القطار المخطوف 
تشبيه الجماعه بالقطار الذى تم اختطافه على ايدى البعض وتغيير مساره وربط هذا التغيير بسيطرة رجال سيد قطب على الجماعه
الفصل الحادى عشر 

مثلث برمودا
فى هذا الفصل حديث عن امر اعتزمت الجماعه عليه وهو نشر الحديث عن تكفير الحكومات التى لا تتبع الشريعه الاسلاميه والبعد عن تكفير الاشخاص ولكن الحكومات فقط حتى يستاثروا بتعاطف الناس معهم
اعتراض الكاتب على سجن احرار الرأى 

من بين ملاحظاته ضد الاخوان هو استعمال الايات فى موضع الخلاف السياسى مما كان يؤذيه
***شكرى مصطفى هو المؤسس الثالث لجاعه الاخوان المسلمين استنبط ذلك من نشر افكاره داخل الجماعه واهتمام مصطفى مشهور بالرجل
***نظام البيعه على الجهاد والالتزام بالكتمان والطاعه
التشابه بين تنظيم الاخوان والماسون فى نظام البيعه والتدرج بين الاخوة وحتى فى شعار الجماعه 

الفصل الثانى عشر
الماسيواخواكيه
روايه عن شدة تعلقه بشيخه ولعجابه برأى الشيخ فى الفاظ لا تجوز مثل الحاج والعالم
**رأى الشيخ فى بعض الشخصيات مثل القرضاوى والعوا والحوينى
حديث طويل ينتقل من فصل الى اخر حول الماسونيه واوجه الشبه بينها وبين الجماعه
الفصل الثالث عشر
الخوارجيون
بدايه الفصل مع قصه سيدنا على والخوارج 

***شكرى مصطفى وفكرة اقامه دوله الخلافه على يديه
التدريبات الخاصه بالاخوان فى نادى الشمس بعد اغلاقه 

الفصل الرابع عشر
مدينه التكفير
سرد لسيرة جده لوالده وجده لامه وعلاقه جده بتحضير الارواح
حديث مع اخوانى مقيم بالكويت حول وعود الاخوان التى لا تنفذ
_ تكفير اى شخص يترك الجماعه تماما مثل ما حدث مع الغزالى حين تم فصله من الجماعه 

*** نقد صريح لكتابات سيد قطب " فى ظلال القرآن" لانه كتن يكفر المجتمعات المسلمه فى تفسيره لايات القرآن 
الفصل الخامس عشر
شعب الله المختار 

** عودة اقسام الوحدات الى جماعه الاخوان واختراق الجيش والقضاءوالاعلام حتى يتاح للجماعه التمكين
ذكر شكرى مصطفى ونقده بانه كان يعتقد انه المهدى المنتظر ودعوته الناس للهجرة فى حال تم تضييق الخناق عليهم
***استعراض لفكر سيد قطب وفكرة الحاكميه "تطبيق الشريعه " الجاهليه " تجهي المجتمع "ورده للعقيدة الصحيحه عن طريق المصلحين 

راى الشيخ القرضاوى فى افكار سيد قطب وان هذه الافكار بعيدة عن فكر الجماعه الا انه فوجىء بدفاع د مرسى ومحمود عزت عن افكر سيد قطب فى برنامج مع ضياء رشوان 
الفصل السادس عشر 
الذئبه الحمراء
مقالات الاخوان التى تتحدث عن الليبراليين تصفهم بالفوضى وانهم اتباع ميكيافيللى 

** الباحث فى علم نفس الجماعات يعرف ان الجماعه اذا شعرت بالخطر تسعى الى وأد اى حركات تجديديه 
الفصل السابع عشر 
الحقيقه
اليمن كانت من بين مشاريع حسن البنا 

فكرة اقامه الخلافه اى كانت الوسائل المستخدمه 
شكرى مصطفى ودخول جماعه الاخوان المسلمين عن طريق مصطفى مشهور
اكتشافه ان عميد بالنيابه العسكريه كان عضوا فى الاخوان بعد وفاته 

احياء قسم الوحدات الذى لولاه ما نجحت الثورة وان الاخوان منتشرون فى الجيش المصر ى
انتهى ..................





الأحد، 6 يناير 2013

هتاف صديقتى ...صديقة البرنامج

رغم مرور السنوات..مازالت   تسكن  ذاكرتى ..و قلبى ..لا انساها
عندما تعرفت عليها  ..فى اول خطوات الغربه ..بدأ تعارفنا بسؤال فى التاريخ  ..كانت صديقتى  برائحه القهوة والهال وطعم الزعتر والميراميه  ...جميله ضاحكة  ..فى مثل عمرى.. نفس تاريخ الميلاد ..اليوم والشهر والعام  ..

...مثل كل الفلسطينيات تتحلى  بخريطه فلسطين الذهبيه ...مثل كل الفلسطينيات اسمها له علاقه بالقضيه ..كفاح ..نضال ..جهاد ..هتاف 
ولماذا  اختاروا لك هذا الاسم ...لاظل اهتف طول العمر ....
كل يوم  تطرق بابى تسألنى سؤال ..من فتح الاندلس ..اين يقع بحر قزوين ..من صك العملة وهكذا ..صديقتى كانت صديقة البرنامج تبحث عن اجابات لتشارك فى المسابقة  .. على  الراديو ......تقول سوف اشارك باسمك فى الاجابة فسألتها عن الجائزة قالت لى مجموعه كتب ...اذن لا مشكله انت تفوزى وانا اقرا مجانا  .. علمتنى كيف اصنع فطائر الزعتر والسبانخ ...علمتنى كيف استمتع بالجلى " غسيل المواعين " وان يكون طقسا له قواعد ... صديقتى ترتدى ثوب الامهات  ولهاذات النكهة  ..هتاف تشبه القضيه الفلسطينيه ...قصه ذات شجون ...وذكرى المقاومة ان انجاب البنات ليس عيبا او مسؤوليه النساء وحدهن ...
 شعرها الاسود ..خصلات الليل تنساب وراء ظهرها ..امواج ناعمه من الحرير ... نجما  يومض فى سماء الليل ثم يغيب ..تسألنى ...تحاورنى .. تناقشنى ...نختلف فتستبد...ثم تعاود السؤال 


السبت، 5 يناير 2013

غياب الشمس لا يعنى ان الظلام سوف يدوم ..كلها ساعات ..ويعود الامل وينتشر الضوء 
كيف تستطيع ان تمنع مشاعرك بالحزن لفقدان شخص عزيز 
كيف تتغلب على مشاعر القلق..فى انتظار لحظات حاسمه فى حياتك
كيف تواجه مشاعر الحنين عندما يبتعد عنك من تحب 

ومشاعر الفرحه التى تعلن عن نفسها تلقائيا ..ولا نستطيع حتى اخفاءها
مشاعر الخجل ..والتعاطف ..احاسيس الالم والدهشه والمفاجأة 

الامر اشبه بمحاولة غلق باب فى مواجهة اعصار
مشاعرنا ذلك الاعجاز الذى  يتحكم بنا ويحركنا
مشاعرنا التى لا تتفق غالبا مع افكارنا ..كيف نتحكم بها؟؟

الثلاثاء، 1 يناير 2013

من اسبوع سافرت اناوزوجى وابنى الى العاشر من رمضان ..مشوار لا يسمى سفرا الا مجازا ..مدينه هادئه جدا بها مصانع كثيرة بعض المصانع ملحق بها ..منفذ بيع لمنتجات المصنع والاسعار هناك بفارق كبير جدا عن المحال التجاريه والمولات ..
حان وقت الغداء فذهب بنا زوجى الذى يعمل هناك " بالمناسبه " الى هايبر ماركت ..فى طرف المدينه او مدخلها ..الهايبر ماركت كبير جدا وامامه متسع من اماكن انتظار السيارات ..التى كانت تصطف باعداد كبيرة جدا لم اكن اتوقعها ..وكنت اتخيل ان المكان يهوى بالداخل ..وسألنى ابنى كم يتكلف مثل هذا المشروع فقلت له بالطبع ملايين كثيرة ..فوجئت بكم الناس فى داخله وانه منظم وجميل جدا ..وبه مطعم كبير تختار الطعام الذى تريده ثم تحاسب عليه وتجلس فى منطقه الطاولات لتناوله ..اصناف عديدة من الاطعمه  باسعار معقوله جدا ومذاق  بيتى ...المهم ان اغلب الناس كانت تشترى طعام لتأخذه الى البيت ويتحدثون فى الهاتف يتناقشون عن الاصناف والمرغوب به ...سائق الدليفرى لمطاعم مختلفه اصبح ظاهرة فى مدخل العمارة ..والعمارات المجاورة ..لا اعرف هل هذه ظاهرة طيبه جديدة علينا ولماذا زادت بكثرة هذه الايام ...ابنتى الصغير مولعه بالاكل من المطاعم خارج البيت وتكون شهيتها افضل ..بعكس اخوتها وانا مثلا ..ما السبب فى هذه الظاهرة حتى اماكن الفوود كورت تكون مزدحمه جدا فى اى موول ؟؟؟