الثلاثاء، 31 ديسمبر 2013

2013

فوجئت اليوم انه الاخير فى عام 2013 ...وبرغم انه عام ملىء  بالاحداث ..عام تكاثفت عليه سحب الخلاف وغبار الالم  ...عام تخضبت الارض فيه بلون الدم ..وتكحلت بدموع الفراق ..وازدحم باطن الارض باجساد الشباب النضرة  ..وانفطرت قلوب الامهات وتغيرت فيه الخريطة سياسيا ... واصبح الخوف يملأ العقول ..والبلادة تسيطر على القلوب ..
اعتقد ان هذا العام شهد تدنيا غير مسبوق فى الاخلاق لدرجة لا تصدق حتى اننى بعد تفكير  وصلت الى نتيجة ان ما يحدث كان قائما بالفعل ولكن هناك غشاوة جعلتنا لا نراه او نتجاهل حدوثه فمن غير الممكن بل من المستحيل ان تصرفات البشر يحدث بها هذا التغيير الملحوظ والمفاجىء الى هذا الحد ..
وبرغم كل هذا الا انه على المستوى الشخصى لا استطيع ان انكر ضوء الشمس فى حياتى وبقعه الامل التى غمرتنى بوصول حفيدى الغالى ..ابتسامه صغيرة منه كفيله ان تذيب كل هموم الدنيا ..رائحة الحب وطعم الحنان والوحيد الذى استطاع ان يسحب بساط الاهتمام من تحت اقدام كل الاشخاص فى عالمى ..حمزة وامل قصه حب لا تنتهى ...

الاثنين، 30 ديسمبر 2013

حوار مع صديقى الميت

ازيك عامل ايه
الحمدلله بخير بس خايف لان التجربه جديدة ولها رهبة
بس انت الحمدلله انسان طيب وعارف ربنا ..ماتقلقش
انا جايه النهاردة امشى معاك واوصلك لمثواك الاخير وارجع تانى علشان اعيط عليك
خليتينى اضحك والله ..مش عارف هم اللى بيعيطوا دول بيعيطوا ليه
على نفسهم طبعا
طيب عندى سؤال انت مش زعلان انك مش هتشوف ولادك وحبايبك مرة تانيه
ياستى ..هو مين جه الدنيا مع حبايبه واولاده زى ما جينا فرادى بنمشى برضه فرادى ..بس ربنا يسترها معايا
ربنا يسترها معانا جميعا المفروض تقولها كده
لا خلاص وقت الجمع انتهى ..ده وقت المفرد ووقت كل واحد يتكلم عن نفسه وعن عمله وبس
طب انت ايه رايك فى الجنازة ..".ضحكة "
بتضحكى ليه ..ما انت فاهمة كل حاجه
اصل دايما كنت اشوفك بتكتب  ايات بتتكلم عن المنافقين
اه ..وانا كنت باقرا لك كلام عن ازدواجيه المعايير وشيزوفرينيا المجتمع
يعنى انت فاهم قصدى ايه
طبعا واخدت بالى
اه لو تشوف كاتبين عنك ايه على الفيس بوك
طبعا كاتبين خبر وفاة الارهابى ...ده حتى صورة بروفايلى علامة رابعه ...مش خلاص اخدنا الختم رسمى
لا مش هتصدق ..كاتبين دمث الخلق وبيدعوا لك بالجنه
تفتكر انت رايح الجنه ..
" ضحكة كبيرة "وقال ربنا يرزقنا الجنة ..اجمل شىء فى لقاء ربى انى مطمن مش قلقان من المحاكمة ولا قلقان من الشهود
طيب اسيبك انا هنا مع السلامه والى لقاء قريب جدا ...رغم ان كلنا فاكرين انه ابعد مايكون او فاكرين انه مش هيحصل معانا
بس قبل ما ابعد ..نفسى اقولك كلمة مش بذمتك احنا بنقتل القتيل ونمشى فى جنازته ..خد بالك من روحك وربنا معاك

الأحد، 29 ديسمبر 2013

بعض الغياب يستأصل جزء من وجودنا فى الحياة
بعض الغياب نستشعر به قيمه من نفتقدهم ..وقت فقدانهم

السبت، 28 ديسمبر 2013

أنا بفضل دايما للآخر


ف جيمات الكونكان والشايب


و ف كشف الحاضر والغايب


وف حجز شقق مصيف بلطيم


أنا آخر تايب في اصحابي


وآخرهم ف الصلا ف التسليم


وف دور المدرسه في التطعيم


وفي وقت السين


أنا آخر جيم


أنا جرح قديم...كان متغطي


إكمني مشتي ولابس كم


سبتني الدنيا بستين أم


وسبتلها ميت مِلّه ودين


ولحد ماتميت ست سنين


أنا كنت بحب البني آدمين


وكرهت الناس من بعديها


علشان نسّوني أنا أصلاً مين


مش فاكر إمتى حقيقي بدأت


إنما فيه فتره فاكرها طشاش


كان فنجان قهوتي مابيفضاش


وبكلم ربنا طول الوقت


عمري ماصدقت بنات غير ريم


ويمكن دلوقتي ما اصدقهاش


آخر مره


شفتها فيها



كانت تقريبا بتعزل


و كان فيه سواق تاكسي منزل


ف شنط ناس حتحل مكانها


ووشوش بني آدمين معرفهاش


أنا ريم يمكن كانت قدي


أيامها... لكن دلوقتي أصغر


عارفه إن أنا يوميا بكبر ؟


وبعجز إكمني مابنساش


أنا فاكر أيام بالميللي


أنا فاكر أيام بالتفصيل


أنا فاكر يوم دفنة أختي


حتصدقي..؟ أكتر مافاكرها


وساعات بنسي ف ليله كبيرها


أنا فاكر شقة قصرالنيل


ومش فاكر حد من السكان


من صغري وعمري مابنسي مكان


أنا أصلاً فاكر بيت شادي


مع إني مازورتوش غير مره


بأمارة فيه برواز بره


كان جواه صورته ف إعدادي


كان لسه ساعتها طالعله شنب


ونا حاسس إني طلعلي أتب


من تقل الشيله و م التفكير


معلش أنا آسف برغي كتير


وبسف ف وقتك وف وقتي


أنا حاسس بدماغي بتتقل


أنا نفسي أنام


أنا عاوز أروّح دلوقتي


متشكر جداً ع الجلسه


حنكمل إمتى علاج طيب ؟


لازم حنشوف بعض قريب


أنا ماشي...


سلام

‫#‏تفرانيل_50‬
‫#‏مصطفي_إبراهيم‬

الاثنين، 2 ديسمبر 2013

هاحكى لكم قصه غريبه حصلت ...مرة كنت زهقانه فقلت انزل اتمشى شوية ...نزلت لوحدى وفضلت اتمشى فى الشارع واتفرج على المحلات لحد ما وصلت لناصيه بنك من البنوك ...فى الناحيه المقابله له على الرصيف كان فى كتب مرصوصه على الارض وكشك قديم وقفت اتفرج على الكتب وكان كل كتاب مغلف بنايلون يحميه من التراب ...المهم اختارت 5 كتب وشفت السعر عليهم فقلت للراجل فى الكشك هاحاسب على دول ...قالى ان سعر الكتب اقل من المكتوب ...وان لى  كتاب هديه  على ذوقه لانى اشتريت منه خمس كتب ...حطهم فى كيس وقلت له شكرا ومشيت ...روحت البيت وفتحت الكيس وحطيت الكتب على السرير علشان اقرر ابدأ باى واحد فيهم ...لقيت الكتاب الهديه بدون غلاف وبدون مقدمة ومفيش اى دليل الكتاب ده اسمه ايه ...المهم اختارت كتاب منهم وقلت ابدأ به ...همست لنفسى طبيعى كتاب هديه ممكن يكون اى كلام وخاصه ان شكل الورق قديم واصفر شوية والغريب ان مفيش اى اشارة لاسم الكتاب ...جطيت الكتب على الكومودينو ...وزى عادتى لازم اقعد اقرا قبل النوم ...اختارت الكتاب الى هاقراه ..وحطيت راسى على المخدة سمعت صوت كلاب بتنبح بصوت عالى وحسيت ان فى حاجه تحت المخدة ..رفعتها لقيت الكتاب اياه مع انى كنت فاكرة انى حطيته مع باقى الكتب على الكومودينو ...المهم فتحت الكتاب حسيت ان الكلاب دى بتنبح فى الاوضه وخفت لوهلة بس استعذت من الشيطان وسميت ..ومخدتش فى بالى ...قعدت اقرا لقيته كتاب ممل بيحكى عن راجل عجوز بيربى كلاب فى حارة والراجل ده ماشى على عكاز ....المهم اكتشفت ان الروايه دى او الكتاب عن العفاريت وانا مش بحب الكلام ده فسبت الكتاب ...مش عارفه ليه قلقت منه وانا عندى صندوق هدايا كبير باشيل فيه الكتب اللى خلصتها ولما اجيب غيرهم اشيلهم فى دولاب للكتب .... تانى يوم نسيت قصه الكتاب ده وصحيت من النوم لقيت الكتاب فوق الكتب اللى على الكومودينو ...قلقت شويه بس قلت بيت وعيال وجايز ايد حد كده او كده وانا نايمة ...قررت اشيل الكتاب فى الدولاب علشان  محدش يقراه اصلا ...ويسألنى اسئله مالهاش اجابات عن العفاريت .وعدى اليوم عادى وقبل النوم مسكت الكتاب اللى باقراه ولسه هافتحه سمعت تانى صوت نباح الكلاب كانه فى الاوضه سألت جوزى انت  سامع صوت الكلاب دى قالى لا ماخدتش بالى ...لحظات ولقيت صوت حاجة وقعت من على الكومودينو جنبى بصيت على الارض لقيت الكتاب اياه ...الليله دى مانمتش اصلا ..وقعدت اقرا قرآن ...واول لما النهار طلع قررت انى اتخلص من الكتاب ده ...فكرت ارميه بس مش عارفه ليه قلت لازم ارجعه للراجل صاحب الكشك ...نزلت من البيت واخدت الكتاب فى كيس مرضيتش حتى احطه فى شنطتى ووصلت عند البنك والتفت للرصيف لقيت كشك كبير وجديد ونضيف بيبيع ورد ...سألت الراجل صاحب الكشك فين بياع الكتب اللى كان هنا قالى اكيد انا غلطانه فى العنوان ..سبت الكيس اللى فى ايدى يقع منى ووقفت تاكسى بسرعه لقيت صاحب الكشك بيقولى الحقى يامدام لسه بالتفت له لقيته ماسك عكاز