طيب نبدأ ازاى ومنين ..عن نفسى طول الفرح ولغايه النهاردة بردد واقول الله يسامحك ياشوشو ...هى اللى اصرت انى البس جزمه سواريه وكعب عالى ..بعد لما رجلايا دابوا من اللف والوقفه
انك تكونى ام عروسه مصريه فده شىء مش سهل ويدعو للفخر بعد ما تشوفى فرح بنتك وفرحتها مع عريسها ..وشقتها وكله الحمدلله تمام... لازم تعرفى ان فى جندى مجاهد ورا القصه الطويله دى ..الموضوع فيه مراحل وفيه خبرات اكتسبتها ..لكن بصراحه برضه رغم اى تعب الام بتكون فرحانه انها بتحاول تسعد بنتها وعريسها ...ومن خلال تجربتى لقيت ان الاحساس بالفرحه ملازم له احساس بالقلق ..ودايما افتكر نفسى زماااان طيب ليه ماكنتش قلقانه على نفسى .. فى يوم زى ده ابقى عاوزة احضن امى واقولها اكيد جه اليوم اللى احس فيه بنفس مشاعرك الجميله ..
اول لما يتقدم العريس وتتم الاتفاقات بيكون فى حماس فى البدايه غير عادى ..عن نفسى كنت باشترى لبنتى من وهى فى اولى ثانوى ..بس لانى مش بحب الزحام كنت باحاول اشترى اذواق تعيش وحاجات ماتاخدش مكان فى التخزين وطبعا زى كل المصريين سحارة السرير وبلاكار الدواليب الخاصه بى وبدولاب بنتى بيكون مخصص للجهاز ...وبعد شويه بيكون البيت كله يعنى ورا الباب تلاقى ..فوق الدولاب تلاقى ...اى مكان فاضى تلاقى كرتونه وعليها مفرش تعرف انه جهاز العروسه ...
انك تكونى ام العروسه فى مصر هتعرفى اماكن كتير جدا للشوبنج ..وتلفى لما تقولى اااااه بجد ..
فى الاول بتكتبى ورقه وقلم وتكونى منظمه وتختارى المحلات بعنايه ..وبعد شويه تلاقى ان الزهايمر اشتغل مش بس عندك لكن عند العروسه كمان ..والشرا بقى ادمان يومى
فى مصر الخطوبه بتكون على العروسه ..والفرح مشاركه بينهم..تجهيز الخطوبه بتكون الاعصاب اهدى والوقت لسه رايق وفى فرصه تختارى بهدوء ..لكن قبل الفرح بيكون التركيز على العروسه والاولويه لفستانها ولوازمه وتجهيز شقتها ..وللفرح ولاخواتها والبيت كله
العروسه فى مصر عليها كل لوازم المطبخ " الحلل والصينى والكوبايات والصوانى وكله كله ......"والتنجيد والستاير والسجاد وكل اكسسوارات الشقه والمفارش ..وطبعا مشاركه الموبيليا .
الحاجات دى بتحتاج لف جامد جدا جداوشيل كتير ..ومرة كنت مع جارتى وقالت لى انها عند تجهيز بنتها راحت سيتى ستارز واشترت كل حاجه بنتها ..واحد فى المحل قالها كان ممكت تشترى نفس الحاجه بنص التمن فى الازهر وحمام التلات ..خدت عربيتها وراحت لقت نفس الاذواق ولو مش موجودة بتطلبها من صاحب المحل بالاسم هو يروح يجيبها مع فرق السعر ..طبعا انا ماصدقتش كلامها ورحت اشتريت حاجات من سيتى ستارز برضه ..فى الاول ملايات سرير وكوفرتات وشويه حاجات مطبخ ..وبعدين قررت اروح الازهر كانت تجربه مثيرة جدا ..مشكلتها هى شيل الحاجه ..لان الشوارع ضيقه وزحمه بس فعلا فى حاجات مميزة وجميله يعنى مثلا ..فى بطانيه فرق السعر بينها وبين سيتى ستارز كان 600 جنيه ..تخيلوا ..
فى واحدة صاحبتى قالت لى انها اشترت كل جهاز بنتها فى يوم واحد من نفس المكان لانها ماكانتش بتشيل اى حاجه لبنتها غير فلوس ..بس طبعا اشترطت على بنتها ماتقولش رأيها هى هتجيب الحاجه كلها من نفس المكان وتخلص ..برضه فكرة
مشكله اليومين دول ان البنت عاوزة تشترى كل حاجه على ذوقها وتلف على كل فتله ..ومفيش اى حاجه تقضى... كميه وقت مهدر ..واموال بصراحه ربنا يكون فى عون الناس ..فى لف على الموبيليا وده ممكن فى القاهرة والافضل دمياط من اولها ومن قصيرها ...بصراحه فى كل الاذواق والاسعار هناك ..بس مشكلتها ان المعارض كلها عمارات وفيها اسانسير لكن تطلع لاخر دور وبعدين تتفرج دور ..دور ..يوم مرهق جدا لكن ربنا بييسر الامور ..وطبعا فى الفرش المودرن اليومين دول الشباب بيعجبه جدا ..
فى يوم مخصوص للسجاد وبرضه مفيش احسن من معارض النساجون فى العاشر او فى طريق المطار او عباس العقاد ...ده موضوع سهل شويه لان فعلا ممكن تشترى من المعرض كل السجاد مرة واحدة وطبعا بعد العفش علشان الالوان ..
بعد السجاد او موازى له الستاير وبصراحه موضوع الستاير متعب شويه لانه شرا وتفصيل وموديلات وافلام هندى وكل اوضه لون ..
بعد لما نخلص شرا الحاجات الرئيسيه بتلاقى حاجات كتيرة جدا ..وتفاصيل فى المطبخ والحمام والنيش ..زى الحاجات البلاستيك ودى كمان على فكرة مش بسيطه مرة دخلت محل اشترى فوجئت بالاسعار فسألت الراجل ليه كده ..قالى اصلها تركى ..طيب فين ياعم الهلال والنجمه والصينى ...وام العروسه والعروسه بعد ماكانوا بيرفضوا يشيلوا كيلو طماطم ..يلاقوا نفسهم شايلين طبق غسيل وعصايا للمقشه ومساحه ..خلاص بقى ..
طبعا الشهر قبل الفرح بنقضى اغلب اليوم فى الشارع ..لحد يوم الفرح علشان كمان شرا هدوم العروسه جديد فى جديد
اهم طلعه فى المواضيع دى كلها فستان الفرح ..يوووووه ..قصه جامده جدا ويمكن اهم واكتر مرحله فيها لف ..طبعا البركه فى الفيس بووك وجروبات العرايس اللى بتقوم بالواجب وتلاقى بنتك معاها الف عنوان اتيليه لفساتين الافراح ..وده اكتشاف جديد بالنسبه لى ..لانى عرفت ان فى ناس بتعمل مشاريع حلوة جدا ومربحه فى بيتها ..يعنى اغلب الاتيليهات هى جزء مقتطع او شقه صاحبه الاتيليه لفترة محددة من اليوم وعندها واحدة او اتنين يساعدوها ..ومجموعه فساتين ومستلزمات زى الورد والتاج والطرحه وكمان جزمه العروسه ...حاليا تأجير الفستان بيكون بالالاف برضه ..يعنى ايامى كنت شاريه فستانى من رجاء الجداوى وكنت باقول عنه حكايه ثمن الفستان كان ربع تمن الايجار حاليا ...ولازم تسيب بطاقه صالحه للاستعمال " يعنى انتخبت بها قبل كده ...مرسى طبعا " وكمان تمضى على وصل امانه وتسيب تأمين محترم.. كل ده علشان تاخد الفستان ليله واحدة ...
من اكبر اماكن النصب فى مصر البيوتى سنتر ..والسبا والكلام الفاضى ده كله ..بس طبعا البنات بتشبط كلها تروح ...برضه الفيس بووك بيبيع كتير فى الفيلم ده ..ونصيحتى لاى بنت..اغلب اللى بيعملوه هناك ممكن فى البيت ...او مع واحدة قريبتك او صاحبتك ..
اكبر مجهود بيتم فى فرش الشقه وخاصه فى انتظار الصنايعيه البهوات..لتركيب الاضاءة والدهانات ..واى اصلاحات الشقه بتحتاجها ..
فى نفس الوقت بتكون ام العروسه قاعدة تنزل كل المشتريات من الدواليب والسحارة والنيش وورا الابواب لتجميعها ونقلها شقه العروسه ..ده يوم وفيلم بيحتاج مساعده من الاخوات والاب والعريس وخال العروسه وابن خالتها كله يشيل للعربيه النص نقل ..وطبعا كل الحاجه بتروح اوضه فاضيه هناك وتتجمع لوقت الفرش وتوزيعها ...
كنت فاكرة انى خلاص مش هاشيل تانى ..لكن والله كل يوم تستجد اشياء جديدة نشتريها ونشيلها للشقه ..فى ملاحظه ظريفه هى كميه الكراتين الفاضيه والشنط اللى بنجمعها بعد فرش الشقه ...كنت باقولهم تفتح مصنع تدوير
بيتخلل القصه دى لف على القاعات واختيار قاعه للفرح وتحديد ميعاد لكتب الكتاب ..وحجز قاعه برضه او مسجد ..وانك تعزم الناس من غير ما تنسى حد ..
خلاص كده احنا نقلنا ..على توضيب شقه العروسه ..وطبعا ربنا يخلى الاهل اللى بتساعد من كل قلبها والاخوات اللى بيعتبروا ان دى شقه بنتهم وعاوزينها تكون منتهى الجمال ..واللى بيشوف اى حاجه ناقصه يجيبها او يعملها وبسرعه ..دى حاجات بتخلينى دايما اقول مهما كانت مشاكل بلدنا لكن فيها حاجه حلوة ..
انك تكونى ام عروسه مصريه مطلوب منك تعملى عشا للعرسان واكل لمدة اسبوع ..يوصلها كل يوم دليفرى وسخن ...وانك تشترى تموين البيت والمطبخ وتسيحى الزبدة البلدى ..وربنا يخلى امى اللى عملت لى كل ده لى ولبنتى ..
اكبر مفاجاة كنت ناسياها هى كحك العروسه ..بصراحه نسيته وامى وبنت اختى كانوا بيقولوا دى فرحه لازم نتلم كلنا ونعمل الكحك ..بس كنت خلاص قربت انتهى قلت لهم لا جاهز علشان الوقت والتعب ..
يوم الفرح صاحبتى الغاليه قالت لى اول لما الفرح يخلص لازم تقلعى الجزمه العاليه دى وتجرى على شقه العروسه تسخنى العشا وتولعى الشمع وتحطى لهم الورد الطبيعى ...
العشا اللى هو موروث مصرى اصيل حمام بالفريك ..وعلى فكرة فى مطاعم بتجهزه وناس بتبعت تشترى جاهز لكن طبعا البيتى يكسب
اااااااه صحيح نسيت اقول حاجه مهمه جدا هى ان ام العريس بتتعب جدا ..هى بتظهر مرتين مرة فى الشبكه ومرة فى الموبيليا ..وبتتعب جدا فى اختيار فستانها فى الخطوبه والفرح ..ومن موقعى ده احب اقولها وبالنحوى ....هيهات
ليست هناك تعليقات:
إرسال تعليق