انا والخيل

فى فيلم قديم بحبه جدا اسمه " لصوص لكن ظرفاء " ..فى الفيلم مشهد احمد مظهر بيدى عادل امام عشرة جنيه ويقولوا روح اشترى لنا ..شويه شيكولاته على شويه ورد على اتنين كيلو تفاح وماتنساش تشترى لنا فازة ..عادل امام قاله يعنى ايه فازة قاله اللى بيحطو فيها الورد ..قاله قصريه يعنى ...اخد السبت وحمله حاجات كتير ورجع لطش اللى لطشه واشترى اللى اشتراه ..اللقطه دى باضحك فيها جدا بس اولادى بيكونوا مبهورين من الاسعار وان عشرة جنيه تشترى كل ده ..
متهيألى ان اكتر شىء يسعد المواطن المصرى هو رخص الاسعار ..وده مش هيحصل الا بزيادة الانتاج ..وده مش هيحصل الا بالشغل المضاعف والجهد ..مش عارفه امتى رجال الاعمال فى مصر هيحبوا البلد دى اكتر من بنوك سويسرا ..امتى يبقى لهم مشاريع وطنيه ..مش محتاجين كومباوند وقرى سياحيه ومدن راقيه ..ولا محتاجين مولات  على اعلى مستوى ..محتاجين زراعه قمح ورز ..وذرة ..محتاجين تربيه دواجن وارانب ..وعجول وغنم .محتاجين اصلاح اراضى ورقعه زراعيه جديدة ...يعنى مش قادرة استوعب سعر اللحمه فى بلدنا او ان دى مشكله مالهاش حل ..محتاجين نسمع عن رجال اعمال حقيقين..... الا هم اليومين دول مالهمش اى حس ليه ؟؟؟