النهاردة رحت اوصل بنتى الصغيرة للمدرسه ..اول يوم لها بعد ما نقلتها من مدرستها ..النقل كان بناء على رغبه والحاح منها طول العام الماضى ..المهم نقلتها واحنا ماشيين كنت بافكر فى ان دى اصغر ولادى وان دايما هى البيبى ..ازاى كبرت ورايحه اولى ثانوى ..وامتى كبرت ..لما وصلنا المدرسه ودحلنا كنت شايفه انها اصغر بنت فى الساحه وان كل اللى حولها بنات كبار ..الغريبه انى دايما اقول ان شخصيتها قويه ومختلفه عن اخواتها وبتعرف تاخد حقها كويس ...فوجئت بها بتعيط ..ومش راضيه تسكت ..قعدت اهدى فيها لحد لما دخلت الفصل ..والمديرة طلبت منى امشى ..
مشيت وانا قاعدة ادعى ان ربنا يرزقها ببنت حلال تصاحبها وتقف معاها ..لكن للأسف اتصلت بى فى الفسحه وهى بتعيط وحاسه ان دى نقله نفسيه عليها ..ومش عارفه اعمل ايه
قاعدة افتكر انى برضه فى اولى ثانوى اتنقلت مدرسه مختلفه ومش فاكرة اى تفاصيل غير صاحبتى اللبنانيه سلمى اللى كانت بتتكلم مصرى معايا ..وانها كانت زى ماتكون امى كانت مسيحيه وكبيرة فى السن عنى علشان ظروف الحرب فى لبنان اتوقفت عن الدراسه فترة ...ازاى كانت طيبه ودمها خفيف جدا فى اللهجة المصريه وخليتنى احب اسم سلمى لدرجه انى اختارته لاول بنت لى ...يارب ياشوشو تهدى وتتعودى على المدرسه ولا انا هاشوف ايام ...ربنا يستر ودى اخرة اللى يمشى ورا كلام العيال
ليست هناك تعليقات:
إرسال تعليق