انتما احمقان

امبارح توفى احد اقاربى ..وكان واجب اروح العزاء .وطبعا بما ان حالتى النفسيه تسمح جدا للعزاء والمناسبات الحزينه قلت لنفسى .فرصه انى اروح واقعد اعيط براحتى من غير ما اى حد يسالنى انت بتعيطى ليه ؟
لبست الاسود ونزلت وبما ان البيت قريب قلت اتمشى المسافه دى وعند البيت كان فى شادر لانتخابات مجلس الشوررى ولانه مناسبه وطنيه كانت شغاله اغنيه " يابلادى يابلادى ." وعند المقطع اللى بيقول "قولوا لامى ما تعيطيش وحياتى عندك ماتزعليش " بدأت اعيط وانا لسه فى الشارع
المهم وصلت العزا ..وكان الجو سخن جدا جدا من حرارة الدموع .ومن الصهد اللى جاى من المطبخ لاننا طبعا فى اى مناسبه لازم نعدى على المطابخ .لان فى ناس جايه من السفر بنى سويف وطنطا والقاهرة ولازم الناس دى تتغدى قبل ما تسافر .فقلت احسن حاجه اعملها انى ادخل عند الحوض واستعمل الميه الساقعه تخفف الحرارة دى كلها واغسل انا المواعين وقد كان
المهم اثناء العزا كان فى واحدة قريبتى حفيدتها عمرها اقل من 3 سنوات بنوته زى العسل ..وكانت عاوزة عصير جدتها ناولتها العلبه البنت رجت العلبه وبصوت عالى قالت " العلبه فارغه لايوجد بها عصير الا القليل " بنفس الالفاظ العربى والنحوى دى استغربت جدا وحطيت ودنى مع البنت دى فعادت الجمله تانى .فانفجرت فى الضحك ايه ده ازاى البنت بتكلم عربى ونحوى بالشكل ده
قالوا لى الفضل فى قنوات الرسوم المتحركه .باللغه العربيه 

المهم ان البنوته دى افسدت مهمتى فى انى اعرف اعيط بل بالعكس كنت قاعده اضحك طول الوقت عليها ومكسوفه من شكلى لكن مش عارفه اسيطر على القصه ..بعد شويه بيبى نايم مع مامته البنت تقوله "استيقظ ياصغيرى "

المهم بنتى قالت لى امسكى نفسك شويه من الضحك .وعرفتنى ان الاطفال فى المدرسه من اول بيبى كلاس بدأوا يتكلموا كده وبصراحه عجبتنى جدا الفكرة والـتاثير ..لكن الغريب ان فى اهل الغوا القنوات دى علشان الاطفال تتكلم عاميه او انجليزى لانهم فى مدرسه انجليزيه
اخر حاجه البنوته باباها  جه وهو نازل شبطت تروح معاه ومامتها بتمنعها .عيب ياسلمى تعالى هنا البنت ردت وقالت "انتما احمقان "
وانا قلت اروح بدل ما حد يشتمنى من كتر الضحك