اصحابى الانتيم

فى حياتنا ناس كتير بنقول عليهم اصحاب ...ساعات افكر من اقرب صاحبه لى ...الاقى ان عندى اصحاب كتير بحبهم كلهم ...وكل واحدة لها مكانه مختلفه ...و على راى جنات اجدع صحاب صحابى من صغرى دول اللى يمشوا معايا دوغرى ...بس برضه فى اصحاب مش من صغرى قوى باعتبرهم انتيماتى ...انتيمتى يعنى مرايتى ...اللى وقت ما احتاج افضفض هى اللى  تيجى على بالى ...اللى بتسمعنى وتحكى لى فى نفس الوقت والاقى بينا شبه كبير ...اصحاب يعنى اول ما اقول ....وحشتنى الاقى التليفون بيرن واقولها والله كنت على بالى ولسه هاتصل بيكى والعيال يضحكوا يفتكرونى باهتش ...صحابى من صغرى بيكون اهاليهم كمان صحاب اهلى ...وبيكونوا من ضمن العيله فى اى مناسبه يسألوا ويقوموا بالواجب ...العيال اللى فاكرين انى بحب الرسم من ابتدائى وفاكرين لعبنا على السلم .وفاكرين لون شريطه شعرى ..وصحابى بتوع ثانوى اللى كانوا معايا فى الغربه وكانت احلامنا براح مالوش حد ...وكنا بنخطط هنلبس ايه فى الجامعه قبل ما نقول هندرس ايه ...اصحابنا زمان اللى بييجوا يزورونا فى اى وقت من غير تليفون ولا اتصال ...والاولاد كانوا بينادوا اصحابهم من تحت هى صفارة تلاقى الواحد طلع البلكونه قبل الرنات والمسيد كوول ...
دلوقت بافرح لما الاقى صاحبتى بنتها بتتجوز ...واعمل انى عندى خبرة واقعد انصحها قال يعنى ....اصحابنا مهما بعدنا عنهم اول لما نسمع صوتهم او نشوفهم بنحس اننا رجعنا تانى لنفس ايام شوفتهم ...بيرجعوا لنا الزمن مش بتغيرهم الايام ...اصحابنا الانتيم بتوع الجامعه والضحك اللى خلص خلاص بعد التخرج وخصوصا اللى كانوا ساكنين معانا فى سكن البنات اللى شافونا واحنا بنلف شعرنا ...وبنقلى البطاطس ونغسل المواعين ...ونلم الجمعيه اول الشهر .وواقفين يحجزوا لنا الدور فى المطعم ...اصحابنا اللى سافروا وغربتهم الايام ومرت السنين واول لما سمعنا صوتهم حسينا اننا ممكن نقعد نحكى ونتكلم زى زمان واكتر ...و

اصحابنا بتوع الفيس اللى عرفناهم من الشرق والغرب وساعات نقول على بعضهم غلسين بس مش قادرين لا نبعد عنهم ولا نبطل نغلس عليهم ونناكف فيهم ...علشان كلهم بالنسبه لى اجدع صحاب