انا والخيل

امبارح كنت  باتفرج فى صفحه من صفحات الصور اسمها "امازينج بكتشرز " ..صور مناطق فى ايطاليا وبولندا .وماليزيا والمالديف بصراحه الصور رائعه ومبهرة وسألت نفسى احنا ليه دايما نقول دى مصر اجمل بلاد العالم ..ومفيش اجمل من مصر ..

النهاردة  كنت فى العين السخنه ..الطريق منتهى الجمال ..والجو النهاردة جميل جدا ..منظر البحر هناك خيالى الوان الميه متدرجه ..والسما روعه ..وعلى الناحيه التانيه الجبل جميل جدا ..والقرى السياحيه مبانى تضاهى اجمل اماكن العالم من الرقى والهندسه ..كل الالعاب الرياضيه والتليفريك فى مصر ..فى القرى اجمل وارقى المطاعم والكافيهات ..
وبين القرى السياحيه فى الطريق العربيات واقفه وعاملين خيام من ملايات السرير والبطانيات ..والستات نازلين الميه بالجلاليب والاطفال بيلعبوا منتهى السعادة ..وفى ناس واقفين يبيعوا سمك ..على الطريق فى السخنه افخر السيارات بتعدى من كل الانواع والنهاردة التفتيش والمرور مش بيفوت اى حد حتى كان فى تفتيش ذاتى للعربيات اللى سايقينها شباب فقط
بصراحه افتكرت الصور اللى كنت باتفرج عليها مع ريحه البحر والوان السما والرمل والامواج وقلت مفيش اجمل من مصر