الخميس، 13 أكتوبر 2011

كان زمان


زمان كان الناس يزوروا تاريخ ميلاد اولادهم علشان الولد يقدر يدخل المدرسه بدرى ..ودلوقتى  الناس تتلاعب فى تاريخ ميلاد اولادهم علشان يقدر يعمل اكونت على الفيس بووك ............................................زمان كانوا العيال يروحوا اول يوم المدرسه بدرى وابوه وامه يروحوا معاه علشا ن يحجز مكان فى اول صف ..آخر مرة رحت المدرسه مع بنتى كا ن فى خناقه جامده علشان كل العيال اولاد وبنات عاوزين يقعدوا آخر صف..................................................................زمان لو سألت اى واحد انت بتدرس ايه يقولك انا اعدادى هندسه القاهرة او علوم جامعة القناة او طب عين شمس ..دلوقتى لو سألت اى حد يرد عليك بتلات حروف  ايه يو سى ..جى يو سى ..ام اس ايه وفى النهايه ما تعرفش هو بيدرس ايه بالظبط ..زمان كنت تفكر الف مرة قبل ما تطلب اى طلب من اهلك وتكون مكسوف وانت بتطلب وتكون ممتن جدا عند تلبيه الطلب ..دلوقتى ابنك يقعد يزن وبدون صبرمهما كان قيمه الطلب "لاب توب بالشىء الفلانى ..او يضيع موبايله وعاوز غيره ..وطبعا ساعه الشرا يغير موقفه امام البائع ويختار اغلى من الاتفاق .. وفيها ايه انت معاك كارت البنك ..وفى النهايه تسمع كلمه شكرا بعد ما تفكره بها .........وزمان كان بيعجبنى جدا التليفزيون على شكل صندوق وله غطاء مصنوع من القماش الابيض وكان له ميعاد وفى حاجه اسمها السلام الجمهورى بعدها ييجى الوششششششش...دلوقتى التليفزيون برواز معلق ع الحيط وكل واحد فى البيت قاعد مع نفسه ومعاه لاب توبه وعايش حياته لوحده ..ياترى انهو احلى زمان ولا دلوقتى 

لنبقى أصدقاء


ان اجمل ما فى الحياة ان يكون لك اصدقاء لان الصديق هو الشخص الوحيد الذى ترى فيه ذاتك ويختلف عن باقى الاشخاص فى حياتك ..فنحن نحب جميع من تربطنا بهم صله دم او قرابه بشكل فطرى ولكن الصديق هو اختيارك ..وقرار خاص بك ولقد اهتم الاسلام بأمر الصداقه "وجعلناكم شعوبا وقبائل لتعارفوا ان أكرمكم عند الله أتقاكم " ..وقال رسول الله صلى الله عليه وسلم "المرء على دين خليله فلينظر أحدكم من يخالل" وقال على بن ابى طالب " الصديق ثم الطريق" ....ومن منظور علم النفس تؤدى الصداقه الى وظيفتين ..1  -خفض مشاعر الوحدة ودعم  المشاعر الايجابيه السارة ..2 -الاسهام فى عمليات التنشئه الاجتماعيه ..ومن آداب الصداقه :ان يحب له الخير كما يحبه لنفسه ...أن يرد غيبته اذا تكلم عليه فى المجالس ...ان يشاركه افراحه ويواسيه فى احزانه ......ان يكثر من الدعاء له بظهر الغيب ..أن يلتمس له المعاذير : ........واذا الحبيب أتى بذنب واحد ...جاءت محاسنه بألف شفيع ويقولون ان الحب اكبر من الصداقه  ولكننى ارى ان الصداقه اعمق من الحب واكثر ثباتا ..لاننى اؤمن بمقوله أرسطو عندما سئل عن الصديق فقال .."انسان هو انت ..الا انه بالشخص غيرك

زمان وانا صغير


زمان وانا صغيرة كنت دايما احب اقف جنب والدى فى البلكونه قرب المغرب و اقوله "انا عاوزة اروح الجنينه " كان يرد على ويقولى " لما الساعه تيجى سته ممكن تروحى الجنينه " وكنت أسأله "ها عرف منين ان الساعه بقت سته " يقولى "بصى على العمارة اللى قدامنا لما تلاقى الضل وصل عند الدور الرابع تعرفى ان الساعه بقت سته ...لحد دلوقتى اعشق مراقبه الضل وعندى اعتقاد ان الضل موجود فى مصر بس وكنت دايما اقف ابص من البلكونه اول لما اشوف قطه لازم اقول لها "بسبس" وكانت تقف وتبص لى ..مش عارفه ليه كنت دايما اقول نفسى يبقى عندى حصان وهدهد وكان منتهى املى الموضوع ده ........من اكتر الحاجات اللى احب اسمعها من وانا صغيرة صوت المعلقه وهى بتقلب الشاى ..وخصوصا لما الصوت ده يكون جاى من بلكونه الجيران او شباك مطبخهم ..وكمان بحب جدا فى مصر منظر الستارة لما الهوى يحركها والناس تقول ان الدنيا طراوة عمرك سمعت الكلمه دى بره مصر 

الثلاثاء، 11 أكتوبر 2011

سنه اولى ابتدائى


مش ممكن انسى اول يوم رحت فيه المدرسه فى اولى ابتدائى ..اليوم ده كان اول شهر اكتوبر وكانت الدنيا بتمطر جامد جدا طبعا احنا دلوقتى نسينا المطر وشهر اكتوبر لسه بنشغل التكييف ..المهم طبعا كل حاجه كانت جديدة ..اول يوم رحت المدرسه مع اخواتى الاكبر منى طبعا مفيش دلع زى اليومين دول انى اروح اول يوم مع ماما وبابا ..المدرسه كانت قريبه من البيت واول لما رحنا عملوا لنا كشف طبى ..والدكتور سألنى انت مسلمه ولا مسيحيه طبعا لانى اعلاميه من يومى ما جاوبتش من غير ما أساله ليه ؟ الدكتور قالى .. عاوز اعرف فقلت له انا مسلمه ..وفى الفصل كنا بنقعد ولد جنب بنت وان قعدت جنب ولد اسمه ماجد لسه فاكرة شكله ومش ممكن انساه .. اول سؤال سألنى ماجد طبعا اسمك ايه قلت له اسمى :أمل السؤال التانى والغريب جدا سألنى : انت باباكى عنده كام بدله ..فقلت له ما اعرفش لما اروح ابقى أسأله ..نفسى اعرف لحد دلوقتى هو السؤال ده معناه ايه ..وفى الفسحه سألنى معاكى سندوتش قلت له ايوة معايا سندوتش مربى فقالى ممكن تدينى ..علشان انا مش بحب الاكل اديته السندوتش وسألته انت معاك سندوتش ايه قالى :سندوتش كلب وانا مش بحب اكله ..كل يوم كنت اديله السندوتش بتاعى ..ماجد كان مسيحى وطبعا ما كانش عندى اى اعتراض لان ده شىء عادى كلنا اصحاب ..فى الفصل كان فى بنت جميله جدا وشعرها اصفر كل شويه ابص عليها وماجد كان بيقولى ما تفتكريش علشان شعرها اصفر تبقى احلى منك ..اكيد طبعا ان هو ده السبب انى افضل فاكرة ماجد وامبارح بعد احداث ماسبيرو افتكرته ودعيت له على فكرة انا سافرت الامارات ..بعد ابتدائى وسبت المدرسه لكن ماسيبتش ذكرياتى الحلوة ابدا
ممكن كل واحد يكتب لى تعليق مين اقرب شخص مسيحى قابلته وربطتك به علاقه طيبه 

الأحد، 9 أكتوبر 2011

الشعب يريد تحرير العقول



الشعب يريد تحرير العقول ...شعار ثورى صاخب يتردد كثيرا هذه الايام الا اننى مؤخرا بات هذا الشعار يؤرقنى ويصعب على فهمه وتحليله ..هل الافكار سجينه وتحتاج الى تحرير ..ام اننا نحن عبيد لافكارنا التى لا تستطيع ان تجعلنا احرار ..كل ما اعرفه عنا جميعا اننا نمتلك طريقه تفكير احاديه تحتاج الى اعادة بناء وتعمير لا تحرير او تغيير ..واننا بفضل هذه الطريقه فى التفكير قد نصل الى وجود اكبر عدد من الاشخاص الناجحين ولكننا ابدا لن نصل الى مجتمع ناجح ومتطور كل منا لا يسمع الا صدى افكاره حتى من يقول لك تحدث انا اسمعك فهو غير مقتنع بما تقول ...تحرير العقول لن يتم الا بمشاركة الاخرين افكارهم وان تتحول هذه الافكار الى صوت عال ثنائى او ثلاثى او الى ماشاء الله ..الفكر المشترك هو الحل للوصول الى مجتمع ناجح اذا كنا فعلا نريد 

السبت، 1 أكتوبر 2011

كل فيسبوكاوى وصورة بروفايله

عندما بدأت التعامل مع عالم الفيسبووك الواسع الجميل لم يكن يشدنى هذا العالم ابدا وكنت اعتقد ان الاشخاص على الفيسبووك ليست هذه شخصياتهم الطبيعيه وان الموضوع به تجميل للافكار ..الا اننى وبعد فترة تغيرت نظرتى لهذا الموضوع وايقنت ان الافكار لا تقبل التزوير ..وان ما يكتبه الشخص علىالفيسبووك هو الاقرب الى ذاته وشخصيته الحقيقيه التى قد لا يعرفها اقرب الناس اليه ..على الفيسببوك انت ذاتك ومشاعرك وافكارك ..الحاجز الزجاجى بينك وبين الاخرين يمنح افكارك الحريه ..والانطلاق ..والحديث على انه عالم افتراضى ..محض خيال بل هو عالم الحقيقه بدون تزييف ..حتى ان اختياركل شخص لصورة بروفايله تكون لها دلاله اقرب الى شخصيته ..الان من صورة بروفايل كل شخص اصبحت أقرأ لمحة من طريقه التفكير واعرف من يعيش فى مصر ممن هو بعيد عنها ..ومن هو كبير فى السن من الشباب الصغير الذى يميل الى صور غريبه وملفته .واخرون يضعون صور شخصيه كلها ابتسامه وتفاؤل وهناك من يختارصورة واضعا يده على خده مفكرا او حائرا او شاردا او مبتسما او مطل علينا من بعيد ..واخرون يضعون صور من يحبون صور تدل على الامومه والاستقرار العائلى وهى يعطى عبر صورته رساله ..وهناك من يقول لنا يكفى ان اكون موجودا بينكم باسمى فقط دون صورة ومن يغير صورته تبعا للتغيرات السياسيه والاحداث المحيطه بنا ..ومن يضع صور هواياته ومن يعتز بعمله ويشير اليه بالصورة ..وهناك من هو فى صفوف المعارضه كل ما يعترض عليه يضع صورته وعليها علامه ممنوع الوقوف قطعيا ..وبعد كل ذلك هل هو فعلا عالم محض خيال وافتراض .